Zjarri përfshin Gojanin e Pukës, urdhërohet evakuimi i banorëve. Flakët afrohen edhe te banesat në Milot

Situata me zjarret në vend është rikthyer dramatike. Fshati Gojan në Pukë vijon të përballet me një situatë të rënduar nga zjarri, i cili po përhapet me shpejtësi i favorizuar nga era e fortë. Pamjet me dron tregojnë përmasat e flakëve, ndërsa tre familje pritet të evakuohen për shkak të rrezikut.

Një prej banesave ndodhet në një situatë veçanërisht të rrezikshme, pasi flakët janë afruar pranë saj. Zjarri ka shkaktuar dëme edhe në mullirin e fshatit. Në zonë pritet të angazhohet edhe një helikopter i tretë, ndërsa operacioni po mbështetet nga rreth 40 efektivë të Forcave të Armatosura dhe një automjet zjarrfikës. Gjatë operacionit janë dëgjuar edhe shpërthime, të cilat dyshohet se lidhen me praninë e fishekëve në zonën e përfshirë nga flakët.

Situatë problematike paraqitet edhe mbi qytetin e Milotit, ku zjarri ka përfshirë një masiv pyjor dhe po përhapet me shpejtësi për shkak të bimësisë së dendur. Flakët kanë krijuar rrezik për banesat pranë zonës. Një tjetër vatër është aktive në Bilaj të Krujës. Po ashtu flakët kanë djegur disa hektarë tokë djerrë dhe një sipërfaqe me pemë, ndërsa zjarri është afruar pranë autostradës Thumanë-Kashar. Tymi i dendur po vështirëson qarkullimin e automjeteve.

Në Dajt është konstatuar riaktivizim i një vatre zjarri. Ndërhyrja vijon me një helikopter, ndërsa autoritetet bëjnë me dije se aktualisht nuk ka rrezik për zonat e banuara. Vatra zjarri raportohen gjithashtu në Lufaj, Gjorm të Sipërm, Tunjë të Re dhe Rraja e Velës. Në Gurë-Lurë dhe Qafë Helmes situata vijon të jetë e stabilizuar. Zonat po monitorohen dhe, sipas të dhënave të fundit, nuk paraqitet rrezik për banesat.