Analisti Preç Zogaj ka reaguar lidhur me masën e “arrestit shtëpiak” dhe “pezullimit nga detyra” ndaj ish-drejtoreshës së SHISH, duke e cilësuar çështjen si të pashembullt dhe me pasoja të rënda për sigurinë kombëtare. Zogaj u ndal te akuzat e ngritura ndaj ish-drejtoreshës, duke theksuar se ato janë veçanërisht të rënda për shkak të funksionit që ajo mbante në krye të institucionit përgjegjës për sigurinë kombëtare.
“Janë dy vepra penale shumë të rënda nga vetë kreu i SHISH, i cili duhej të ishte pararojë e sigurisë kombëtare. Këtu kjo është e rëndë, sepse jo vetëm që nuk është në rolin që i kërkon ligji, por është në rolin e kundërt, duke mbrojtur një person në kërkim. Është e pashembullt kjo”, u shpreh Zogaj. Ai tha gjithashtu se ish-drejtoresha ka komunikuar mbi 70 herë me një person të shpallur në kërkim, ndërsa ky i fundit kërkohej nga policia dhe SPAK.
Në vijim, Zogaj kritikoi edhe publikimin e informacioneve të pjesshme nga dosja hetimore, duke argumentuar se ato mund të ndikojnë në perceptimin publik për personin nën hetim. “SPAK duhet të shkëpusë rrjedhjen e informacioneve të pjesshme që kanë për qëllim dekreditimin e personit nën hetim, duke shmangur thelbin e veprës penale”, deklaroi ai.
