Zv/kryeministrja Koçiu me banorët e pallatit të prekur nga zjarri: Bonus qiraje deri në rikthimin e banesave

Zv/kryeministrja Albana Koçiu zhvilloi këtë të premte një inspektim në pallatin e prekur nga zjarri i dy ditëve më parë në Tiranë. Koçiu u garantoi banorëve se asnjë familje nuk do të mbetet vetëm në këtë situatë të vështirë dhe se institucionet do të reagojnë sa më shpejt për të rikthyer banesat në gjendjen e mëparshme. ”Unë erdha që ta shoh vetë nga afër situatën dhe t’ju garantoj edhe një herë se ajo që ka deklaruar Kryeministri do të realizohet. Të gjitha punimet dhe shpenzimet për rikthimin e pjesëve të dëmtuara në gjendjen në të cilën i keni blerë do të merren përsipër nga kompania e ndërtimit”, iu drejtua Koçiu-banorëve.

”Së bashku me Bashkinë e Tiranës kemi diskutuar edhe për mundësinë e dhënies së bonusit të qirasë, në mënyrë që familjet të akomodohen sipas nevojave të tyre, pasi jo të gjithë zgjedhin të njëjtën zgjidhje për strehimin e përkohshëm”, shtoi Koçiu. Ajo theksoi se ka dy elementë kryesorë. ”Së pari, hetimet që po kryhen për të nxjerrë përgjegjësitë penale dhe për të vënë para ligjit çdo person përgjegjës për situatën e krijuar; së dyti, puna e grupit të ekspertëve teknikë, që po vlerëson dëmet dhe masat që duhen ndërmarrë, si në nivel politikash, ashtu edhe në nivel instrumentesh, në mënyrë që situata të tilla të mos përsëriten më”.

Ajo theksoi gjithashtu solidaritetin me banorët e prekur. Nga ana e saj, drejtoresha e Agjencisë së Zhvillimit të Territorit, Adelajda Roka, u shpreh se afatet nuk do të jenë të gjata. ”Vlerësimi i plotë i situatës pritet të përfundojë brenda një jave. Më pas do të kemi një pasqyrë më të qartë për kohëzgjatjen e punimeve, e cila parashikohet të jetë sa më e shkurtër dhe jo disa vite. Nesër do të nisë puna e një grupi të posaçëm në terren”, tha ajo.