22-vjeçari që vr*u Charlie Kirk, partneri: Më tha që u mbush kupa me urrejtje

Tyler Robinson i akuzuar për vrasjen e Charlie Kirk, ka lënë pas një sërë mesazhesh për partnerin e tij. Zbulimet u bënë publike kur Prokurori i Qarkut, Jeff Gray shpalli 7 akuza ndaj që rëndojnë ndaj Tyler Robinson. Më e rënda është akuza për vrasje, e cila mund t’i shkaktojë të riut dënim me vdekje, nëse shpallet fajtor.

Sipas Jeff Gray, shoku i dhomës i Tyler, i cili është në proces tranzicioni nga burrë në grua dhe me të cilin ai kishte një lidhje romantike, mori një mesazh nga 22-vjeçari më 10 shtator, pas vrasjes së Charlie Kirk në universitetin Utah Valley në Orem, ku shkruhej: ”Shih poshtë tastierës sime”. Shoku i dhomës gjeti një shënim që shkruante: ”Kisha mundësinë ta hiqja qafe Charlie Kirk dhe e bëra”.

Shoku i dhomës e pyeti 2 herë partnerin nëse e kishte seriozisht dhe Tyler i tha se po dhe se ishte penduar që e përfshiu në këtë ngjarje, pasi kishte në plan ta mbante vrasjen sekret deri në vdekje. I pyetur pse e vrau aktivistin e ekstremit të djathtë, Tyler dyshohet se u përgjigj: ”M’u mbush kupa me urrejtjen e tij. Me disa lloje urrejtjesh nuk mund të bëhet kompromis”.

Tyler dyshohet se nisi t’i dërgonte mesazhe shokut të dhomës ndërsa ishte ende në Orem dhe kishte ndërmend të merrte armën e familjes, të cilën më vonë e përdori për të vrarë Charlie Kirk. Ai përshkroi ankthin që përjetoi për ta marrë dhe fshehur armën, si dhe më tej, se ishte i shqetësuar për gjurmët që kishte lënë. Në fund, i tha partnerit se do të dorëzohej, pasi prindërit e identifikuan nga kamerat e sigurisë dhe një sherif, mik i familjes e bindi të dorëzohej.