6 javë izolim për Melburnin pas shpërthimit të valës së re të infektimeve me Covid-19

Për gjashtë javë me radhë banorët e Melburnit në Australi do të qëndrojnë të izoluar në shtëpi për shkak të valës së dytë të infektimit me koronavirus. Prej ditësh autoritetet po identifikojnë mbi 100 raste të reja, ndërsa shtetet e tjera australiane po shkojë drejt zeros. Ky izolim gjashtë javor do t’i kushtojë Melburnit rreth 1 miliard dollarë në javë.

Pesë milionë australianë në qytetin e dytë më të madh të vendit, Melburn, u zgjuan të enjten me vendimin e autoriteteve për të qëndruar të izoluar në shtëpi. Mbyllja e dytë e qytetit vjen për shkak të vështirësisë së autoriteteve shëndetësore për të vendosur nën kontrollon shpërthimin e rasteve të reja të infektimit me koronavirus.

Policia është dislokuar në hyrje-daljet e qytetit për të ndaluar hyrjet e qytetarëve nga shtetet e tjera të Australisë dhe daljen e banorëve të Melburnit.

Banorët e Melburnit, që janë të detyruar të izolohen në shtëpi që nga mesnata e së mërkurës, mund të dalin vetëm për çështje të domosdoshme për gjashtë javët e ardhshme.

Ndërkohë të martën dhe të mërkurën, përpara fillimit të zbatimit të izolimit të detyruar në shtëpi për gjashtë javë, banorët u sulën nëpër supermarkete duke zbrazur raftet e tyre.

“Tregtia ka rënë dukshëm. Por ne tani po ofrojmë dërgimin e ushqimit dhe të kafesë në shtëpi për t’iu kundërpërgjigjur izolimit. Komuniteti po sillet mirë, të gjithë po ruajnë optimizmin dhe po ndihmojnë biznesin vendor,” thotë Matt Byatt, pronari i një kafeneje që qëndron hapur për shërbimin e dërgimit në shtëpi.

Por ky izolim i detyruar në shtëpi vjen me një faturë të madhe financiare. Sipas Ministrisë së Financave, Melburnit izolimi do t’i kushtojë 1 miliardë dollarë në javë.

Shteti australian i Viktoria raportoi më 8 korrik 134 infektime të reja, më pak se një ditë më parë, por shumë më shumë se shtetet e tjera. Shtetet ose tjera territoret e tjera kanë regjistruar vetëm disa ose zero raste të reja gjatë javëve të fundit dhe po vijojnë gradualisht me hapjen e veprimtarisë ekonomike.

Australia deri tani e ka menaxhuar mirë situatën, duke shënuar deri më 8 korrik më pak se 8,900 infektime nga koronavirusi i ri dhe 106 vdekje.