Agjencia Evropiane e Barnave shtyn vendimin për vaksinën e Moderna

Agjencia Evropiane e Barnave (EMA) ka shtyrë vendimin nëse do të rekomandojë përdorimin e një vaksine të dytë kundër Covid-19 deri të mërkurën, tha agjencia të hënën në mbrëmje në Amsterdam.

Një komitet i ekspertëve të EMA ishte takuar të hënën, dy ditë më herët sesa ishte planifikuar fillimisht, për të diskutuar miratimin e vaksinës të zhvilluar nga firma amerikane Moderna. Disa pyetje mbeten të hapura, sipas përfaqësuesit Holandez të komitetit.

Vaksina Moderna tashmë është aprovuar në Shtetet e Bashkuara dhe Kanada. Sapo EMA të rekomandojë vaksinën, Komisioni Evropian duhet ta miratojë zyrtarisht atë, një hap i cili nuk kërkon shumë kohë dhe shihet si një formalitet.

BE ka porositur tashmë 160 milionë doza të vaksinës Moderna.