Aksident në Greqi, 55-vjeçari shqiptar humb jetën pas përplasjes me kamionin

Një shtetas shqiptar 55-vjeçar ka humbur jetën në një aksident tragjik të ndodhur në zonën “Pirgos Ilias” në Peloponez, Greqi. Viktima po lëvizte me biçikletë në një kryqëzim pranë hyrjes së qytetit kur, në rrethana ende të paqarta, u përplas nga një kamion.

Sipas të dhënave paraprake të policisë greke, përplasja ka qenë e fortë dhe i ka shkaktuar plagë të rënda shtetasit shqiptar. Ai është transportuar me urgjencë drejt spitalit më të afërt, por pavarësisht ndërhyrjes së mjekëve, nuk ka mundur të mbijetojë.

Autoritetet greke kanë bërë me dije se trupi i pajetë është dërguar në morg për kryerjen e ekspertizave mjeko-ligjore, ndërsa policia ka nisur hetimet për të sqaruar plotësisht shkaqet dhe rrethanat e aksidentit. Në kuadër të hetimeve, drejtuesi i kamionit është shoqëruar nga autoritetet për t’u marrë në pyetje.

Viktima, sipas informacioneve të para, jetonte i vetëm në zonën e Pirgos, ndërsa familjarët e tij ndodhen në Shqipëri. Ngjarja ka shkaktuar tronditje në komunitetin lokal, ndërsa ende nuk janë përcaktuar saktësisht shkaqet që çuan në këtë aksident fatal.

Policia greke po vijon hetimet për të zbardhur nëse bëhet fjalë për pakujdesi në drejtim, problem teknik apo faktorë të tjerë që mund të kenë ndikuar në përplasjen mes biçikletës dhe kamionit.