Alarm në epokën digjitale, Britania drejt ndalimit të rrjeteve sociale për fëmijët nën 16 vjeç

Një ortek reagimesh ka përfshirë Mbretërinë e Bashkuar, ku prindërit po mbështesin me një shumicë dërrmuese kufizimin drastik të medieve sociale për fëmijët. Lajmi u konfirmua nga sekretarja britanike e Teknologjisë, Liz Kendall, duke sinjalizuar se qeveria është gati të ndërmarrë një nga hapat më radikalë të rregullimit të hapësirës virtuale.

Aktualisht, ministritë po shqyrtojnë seriozisht zbatimin e një modeli të ngjashëm me atë të Australisë, i cili sanksionon me ligj ndalimin e hapjes së llogarive në mediet sociale për të gjithë fëmijët nën moshën 16 vjeç. Ky propozim ka sjellë një angazhim qytetar të paprecedentë: më shumë se 80,000 persona u janë përgjigjur konsultimeve publike të qeverisë.

Shifrat që flasin vetë: Nga rreth 42,410 prindër që morën pjesë aktive në këtë konsultim, plot 9 në 10 prej tyre votuan pro kufizimeve të rrepta. Kjo përkthehet në dhjetëra mijëra zëra familjarë që kërkojnë ndërhyrjen emergjente të shtetit.

Ndërhyrja “brenda javëve”: Premtimi i Keir Starmer
Në një intervistë dhënë për “Sunday Mirror”, sekretarja Kendall pohoi se ky ndalim radikal është “padyshim në tryezën e diskutimeve”.
“Kemi marrë një përgjigje vërtet dërrmuese. Prindërit po bërtasin për ndihmë dhe mbështetje. Ata e kuptojnë se ka dritare pozitive në botën digjitale, por janë të tmerruar nga ajo që fëmijët e tyre po shohin çdo ditë në ekrane.”
— Liz Kendall, Sekretare e Teknologjisë në MB

Kjo deklaratë vjen si treguesi më i fortë se Londra zyrtare po përgatit terrenin ligjor për ndalimin e madh. Presioni politik dhe moral arriti kulmin pas një takimi prekës të Kryeministrit britanik, Keir Starmer, me prindërit e fëmijëve, vdekjet e të cilëve u lidhën tragjikisht me abuzimet dhe varësinë nga mediet sociale. Starmer premtoi veprime konkrete “brenda javëve, dhe jo muajve”.

Përveç bllokimit të llogarive, në tryezë janë edhe opsione të tjera, si ndalimi i plotë i disa aplikacioneve specifike dhe çaktivizimi i veçorive algoritmike që krijojnë varësi të lartë psikologjike te të miturit.

Skepticizmi: A zgjidhet problemi duke mbyllur sytë?
Megjithatë, jo të gjithë ndajnë të njëjtin entuziazëm për këtë zgjidhje me “shpatë”. Komisionerja e Fëmijëve për Skocinë, Nicola Killean, ka ngritur pikëpyetje të mëdha mbi efektivitetin real të një mase të tillë, duke argumentuar se ndalimi mekanik nuk prek rrënjët e së keqes.

Në qëndrimin e saj zyrtar të dorëzuar pranë qeverisë, Killean theksoi se të dhënat dhe provat mbi efikasitetin e këtyre ndalimeve janë ende “të kufizuara, të përziera dhe në zhvillim e sipër”. Sipas saj, rreziku më i madh është se “kufizimet e përgjithshme mund të zhvendosin padrejtësisht përgjegjësinë nga vetë platformat teknologjike tek fëmijët”, duke lënë të paprekur rrezikun që buron nga dizajni i vetë algoritmeve.

Përgatiti: Albert Vataj