Alarm në Fiumicino: Ushtrimi antiterrorist shkakton panik mes të shtënave dhe britmave

Një ushtrim antiterrorizmi dhe mbrojtjeje civile u zhvillua në Terminalin 5 të Aeroportit të Fiumicinos, në Romë, i koordinuar nga Prefektura e Romës dhe forcat e policisë. Aktiviteti kishte për qëllim testimin e gatishmërisë së institucioneve për të përballuar një situatë emergjence dhe për të përmirësuar reagimin ndaj kërcënimeve të mundshme.

Por kjo shkaktoi panik te udhëtarët e pranishëm.

Në ushtrim morën pjesë një sërë institucionesh dhe autoritetesh: Aeroporti i Romës, ENAC (Autoriteti Italian i Aviacionit Civil), ENAV (Autoriteti Kombëtar i Aviacionit), Shtabi i Policisë së Romës, Karabinierët, Guardia di Finanza, policia lokale, zjarrfikësit, Autoriteti Portual, Stacioni i Policisë së Fiumicinos, Kryqi i Kuq Italian dhe Ares 118. Ky koordinim kishte për qëllim të simulonte një situatë komplekse me të shtëna, pengmarrje dhe britma, duke testuar koordinimin midis institucioneve të ndryshme.

Sipas raportimeve të ‘La Repubblica’, ushtrimet u zhvilluan në zonën e Terminalit 5, e cila nuk përdoret për trafikun e pasagjerëve, dhe nuk ndikuan në operacionet normale të aeroportit. Pjesëmarrësit ndoqën skenarin e Planit Kombëtar të Sigurisë, duke vlerësuar reagimin e shpejtë të forcave të sigurisë, koordinimin me zjarrfikësit dhe shërbimet e emergjencës, si dhe menaxhimin e situatës nga autoritetet civile.

Ushtrimi vijoi gjatë gjithë ditës pa ndërprerë fluturimet apo rrezikuar sigurinë e pasagjerëve dhe stafit aeroportual. Aktiviteti synon të forcojë kapacitetet e emergjencës dhe të rrisë gatishmërinë e të gjitha institucioneve të përfshira për situata të mundshme të rrezikshme në të ardhmen.