Kreu i PD-së, Sali Berisha ka reaguar përmes një postimi në rrjetet sociale në lidhje me atentatin e dytë të dështuar ndaj ish-presidentit amerikan Donald Trump, të ndodhur ditën e djeshme në Florida.
Berisha shkruan se kjo ngjarje e rëndë ka tronditur SHBA-në dhe mbarë botën, ku sipas tij, armiq të lirisë mendojnë të diktojnë me plumba rezultatin e zgjedhjeve presidenciale në SHBA, duke kryer në një hark kohor dy mujor një atentat tjetër tentativë vrasjeje ndaj Trump.
Reagimi i plotë:
Atentat tjetër ndaj ish-presidentit Donald Trump.
Miq, mbrëmë një ngjarje e rëndë tronditi SHBA dhe mbarë botën. Armiq të lirisë që mendojnë të diktojnë me plumba rezultatin e zgjedhjeve presidenciale në SHBA kryen në një hark kohor dy mujor një atentat tjetër tentativë vrasjeje ndaj kandidatit për President të Partisë Repubilkane, ish-presidentit Donald Trump në fushën e tij të golfit në Palm Beach. Atentatori Ryan Wesley Routh u pikas nga shërbimi i fshehtë i i presidentit që qëlloi drejt tij në momentin kur ngriti armën dhe po merrte shenjë ish-presidentin për të qelluar atë. Presidenti Trump fill pas atentatit që sipas autoriteteve zyrtare synonte vrasjen e tij njoftoj në platformën X se ai ishte shëndoshë e mirë dhe bëri thirrje për Bashkim, Paqe, të bëjmë Amerikën të madhe përsëri. Ne nuk dorëzohemi!
Partia Demokratike e Shqipërisë shpreh solidaritetin e saj me Partinë Republikane dhe kandidatin e saj për President Donald Trump dhe dënon me forcën më të madhe këtë akt kriminal me të cilin forca të errësirës duan të përcaktojnë me plumba dhe jo me votë rezultatin e zgjedhjeve presidenciale në SHBA, vendin e madh të lirisë.