Bisedimet SHBA-Ukrainë: Zelensky paralajmëron ndryshime dhe falënderon NATO-n dhe BE-në

Ndërsa në Florida zhvillohen bisedimet mes SHBA-së dhe Ukrainës, presidenti ukrainas Volodymyr Zelensky ka komunikuar me sekretarin e përgjithshëm të NATO-s, Mark Rutte, dhe presidenten e Komisionit Europian, Ursula von der Leyen.

Zelensky theksoi se ditët e ardhshme do të jenë vendimtare dhe falënderoi NATO-n dhe BE-në për mbështetjen e tyre të vazhdueshme ndaj rezistencës ukrainase përballë sulmeve ruse.

Gjatë telefonatës me sekretarin Rutte, ai u shpreh se shumë gjëra mund të ndryshojnë në ditët që vijnë dhe se bashkëpunimi i ngushtë me Aleancën pritet të jetë jashtëzakonisht efektiv.

Po ashtu, Zelensky njoftoi se ka biseduar edhe me presidenten e KE-së, Ursula von der Leyen, duke e falënderuar për mbështetjen e qëndrueshme.

“Ursula i kushton vëmendje të posaçme forcimit të qëndrueshmërisë sonë ndaj sulmeve të vazhdueshme ruse kundër infrastrukturës dhe sistemit tonë energjetik,” shkroi Zelensky në platformën X.