Një tjetër situatë aspak e mirë mund të ndodh në Ballkan. Përfaqësuesi i komunitetit ndërkombëtar në Bosnje-Hercegovina, Christian Schmidt, paralajmëroi se vendi është në rrezik të menjëhershëm për t’u shpërbërë dhe tha se ekzistojnë gjasa “shumë reale” për rikthimin e tij në konflikt.
Në një raport për Kombet e Bashkuara, Schmidt pohon se nëse “separatistët serbë vënë në zbatim kërcënimet për rikrijimin e ushtrisë së tyre, duke i ndarë forcat e armatosura kombëtare në dysh”, atëherë në Bosnjë do të duhet të dërgohen më shumë paqeruajtës ndërkombëtarë, për të penguar rrëshqitjen e vendit drejt një lufte të re.
Mungesa e përgjigjes ndaj situatës aktuale do të rrezikojë Marrëveshjen e Dejtonit, ndërsa paqëndrueshmëria në Bosnjë do të kishte implikime më të gjera rajonale.
