Djali i Pablo Eskobarit: Babai, lidhje me trafikantët serbë

Botimi në Serbi i librit të djalit të narkotrafikantit më të madh të botës, Pablo Eskobar, ka shtuar zërat për një bashkëpunim të vjetër mes narkotrafikantëve latino-amerikanë dhe atyre serbë.

Teksa në faqen e Juan Eskobar, autor i librit për jetën e babait të tij, u shkruan mesazhe dashamirëse nga shumë serbë.

Kurse vetë Juan, në një intervistë për gazetën serbe “Veçerni Novosti”, thekson se shumë serbë tregojnë ende respekt për familjen e tij. Duke shtuar edhe faktin se ka dëgjuar që në perëndim, kokaina është tregtuar nga klane të fuqishme serbe.

Në fakt, prej kohësh janë botuar disa volume mbi ekzistencën e klaneve serbe të lidhura me UDB-në që tregtonin drogën në Europën Perëndimore. Një nga këto është edhe ajo e udhëhequr nga Zhelko Razhnatoviç (Arkani). Dhe flitet që më pas, me paratë e drogës u financua edhe lufta në Bosnjë e Kosovë.

Madje shërbimi sekret gjerman, bëri të ditur se edhe në vrasjen e Jusuf Gërvallës, ka marrë pjesë një komandant i UDB-së që merrej edhe me trafikimin e drogës.