Zyrtari më i lartë i administratës Trump për antiterrorizmin, Joe Kent, ka dhënë dorëheqjen nga posti i tij, duke cituar kundërshtimin ndaj luftës në Iran dhe duke i kërkuar presidentit të “ndryshojë kursin”. Në një letër të postuar në llogarinë e tij në X, Drejtori i Qendrës Kombëtare të Antiterrorizmit, Joe Kent, deklaroi se Irani nuk përbënte “asnjë kërcënim të afërt” për SHBA-në dhe pohoi se administrata “e nisi këtë luftë për shkak të presionit nga Izraeli dhe lobi i tij i fuqishëm amerikan”.
Shtëpia e Bardhë e hodhi poshtë letrën, duke thënë se Trump kishte “prova bindëse” se Irani do të sulmonte i pari SHBA-në. Duke folur në Zyrën Ovale, Trump e quajti Kentin një “djalë të mirë”, por “të dobët për sigurinë”, dhe se letra e dorëheqjes e bëri të kuptonte se “ishte mirë që ai ishte larguar”. Me largimin e tij, Kent, 45 vjeç, një veteran i forcave speciale të SHBA-së dhe i CIA-s, bëhet figura më e profilit të lartë brenda administratës Trump që kritikon publikisht operacionin SHBA-Izrael në Iran. Në letër, Kent pretendoi se “zyrtarë të lartë izraelitë” dhe gazetarë me ndikim amerikanë kishin shpërndarë “keqinformim” që e çoi presidentin të minonte platformën e tij “Amerika e Para”.
Kent, një mbështetës i kahershëm i Trumpit, i cili kandidoi pa sukses dy herë për Kongresin, u nominua nga presidenti në fillim të administratës së tij dhe u konfirmua me vështirësi në postin e tij, me shumë demokratë që kritikuan lidhjet e tij me grupe ekstremiste. Ai citoi shërbimin e tij ushtarak dhe vdekjen e gruas së tij, Shannon Kent, një teknik kripologjie e marinës e vrarë në një bombardim në Siri në vitin 2019, duke thënë se “nuk mund të mbështesë dërgimin e brezit të ardhshëm për të luftuar dhe vdekur në një luftë që nuk i shërben asnjë përfitimi popullit amerikan dhe as nuk justifikon koston e jetëve amerikane”.
Sekretarja e Shtypit e Shtëpisë së Bardhë, Karoline Leavitt, deklaroi se sugjerimi i Kentit se “Trump mori vendimin bazuar në ndikimin e të tjerëve, madje edhe të vendeve të huaja, është fyes dhe qesharak”. Ajo shtoi se “siç ka deklaruar qartë dhe shprehimisht Presidenti Trump, ai kishte prova të forta dhe bindëse se Irani do të sulmonte i pari Shtetet e Bashkuara”. Komentatori konservator i medias, Tucker Carlson, me të cilin Kent ka lidhje të ngushta personale, e vlerësoi Kentin, duke thënë se “Joe është njeriu më i guximshëm që njoh, dhe ai nuk mund të shkarkohet si një i çmendur”. Ai theksoi se Kent po largohej nga një punë që i jepte akses në inteligjencën më të lartë dhe se “neokonët do të përpiqen ta shkatërrojnë për këtë”.
Marrë nga BBC News