Dy policë dhe një tjetër viktimë nga shpërthimi në Moskë

Dy oficerë policie dhe një person tjetër u vranë në një shpërthim në jug të Moskës gjatë natës, njoftoi Komiteti Hetimor i Rusisë të mërkurën. Ngjarja tragjike ndodhi rreth orës 01:30 me orën lokale, pranë vendit ku të hënën shpërtheu një makinë-bombë që vrau gjeneralin e lartë rus, Fanil Sarvarov, i cili drejtonte departamentin e trajnimit të Shtabit të Përgjithshëm të Rusisë.

Komiteti Hetimor (SKR) deklaroi në kanalin e tij në Telegram se dy oficerë të policisë rrugore kishin vënë re një person të dyshimtë pranë një makine policie. Kur ata iu afruan për ta ndaluar, një pajisje shpërthyese u detonua. Të dy oficerët u dërguan me urgjencë në spital, por fatkeqësisht ndërruan jetë nga plagët e marra.

SKR shtoi se edhe “një person që ndodhej pranë oficerëve të policisë” u vra. Agjencia shtetërore ruse e lajmeve TASS raportoi se “edhe i dyshuari ka vdekur”. Një hetim penal është hapur menjëherë pas incidentit për të zbardhur rrethanat e plota të shpërthimit.

Ky shpërthim i fundit vjen në një kohë tensionesh të larta. Rusia ka akuzuar Kievin se qëndron pas disa sulmeve që kanë shënjestruar oficerë ushtarakë rusë dhe figura pro-Kremlinit që nga fillimi i pushtimit të plotë të Ukrainës në shkurt 2022. Ndërsa Ukraina ka konfirmuar përgjegjësinë për disa nga këto sulme, ajo nuk ka komentuar mbi bombardimin e së hënës që vrau gjeneralin Sarvarov.