Dy zjarre të fuqishme në Salaminë, 2 viktima dhe dhjetëra të evakuuar

Dy persona kanë humbur jetën pas shpërthimit të dy zjarreve të fuqishme, me vetëm pak minuta diferencë, në ishullin grek të Salaminës, në afërsi të Athinës. Ndërkohë, autoritetet kanë nisur një operacion të gjerë për evakuimin e banorëve dhe pushuesve nga zonat e rrezikuara.

Sipas transmetuesit publik grek ERT, identiteti i dy viktimave ende nuk është përcaktuar. Pesë persona të tjerë, të cilët kanë pësuar djegie si pasojë e flakëve, janë shpëtuar dhe janë transportuar për trajtim në Qendrën Shëndetësore të Salaminës.

Zjarri i parë u raportua rreth orës 14:40 me kohën lokale dhe u përhap me shpejtësi, i favorizuar nga erërat e forta. Autoritetet po përpiqen të mbajnë nën kontroll dy vatrat, pasi ekziston frika se ato mund të bashkohen dhe të shkaktojnë një zjarr edhe më të madh.

Rreth 200 zjarrfikës janë angazhuar në operacion, së bashku me rreth 50 automjete zjarrfikëse dhe disa mjete ajrore. Ekipet në terren po punojnë intensivisht për të frenuar avancimin e flakëve dhe për të mbrojtur zonat e banuara.

Paralelisht, ka nisur edhe evakuimi nga deti. Një zëdhënës i Rojës Bregdetare greke bëri të ditur për ERT se rreth 90 persona janë nxjerrë nga zonat e rrezikuara përmes detit. Për operacionin janë angazhuar pesë mjete patrulluese, ndërsa në ndihmë kanë ardhur edhe disa mjete lundruese private.

Nënkryetari i Bashkisë së Salaminës, Thodoris Zannis, tha se përparësia e zjarrfikësve është të ndalojnë përhapjen e flakëve përtej një mali në ishull dhe të parandalojnë bashkimin e dy vatrave.