Gjermanët që thyejnë rregullat e karantinës do të izolohen nëpër spitale dhe kampe refugjatësh. Nisma konsiderohet e nevojshme nga autoritetet për të frenuar numrin e rasteve dhe viktimave nga Covid-19.
Saksonia ka konfirmuar planet për të futur shkelësit e karantinës në një seksion më vete të një kampi refugjatësh, që pritet të ndërtohet javën e ardhshme. Zyrtarë të landit thanë se kjo do të bëhet vetëm për personat që do të jenë shkelës të përsëritur të rregullave të karantinës.
Në landin jugperëndimor, Baden-Württemberg, do të përdoren spitalet për të izoluar shkelësit, nën ruajtjen e policisë. Në Brandenburg, autoritetet do të fusin shkelësit në qendrat e refugjatëve, ndërsa në landin Schleswig-Holstein në qendrat e riedukimit të të miturve.
Ekspertë ligjorë thanë për gazetën gjermane “Die Welt” se qeveritë lokale të landeve kanë fuqi për ta bërë këtë gjë, bazuar në Aktin e Mbrojtjes nga Sëmundjet, miratuar fillimisht në mars dhe rinovuar në nëntor nga Bundestagu.