Gjermania drejt rikthimit të shërbimit ushtarak vullnetar

Partitë e koalicionit qeverisës në Gjermani kanë rënë dakord për një model të ri rekrutimi ushtarak, që synon zgjerimin e trupave përmes shërbimit vullnetar. Plani përfshin një proces kombëtar rekrutimi dhe objektiva të qarta për rritjen e kapaciteteve të Bundeswehr-it.

Nëse numri i vullnetarëve rezulton i pamjaftueshëm, parlamenti gjerman do të ketë mundësinë të aktivizojë shërbimin e detyrueshëm ushtarak, ku kandidatët do të përzgjidhen me short për të plotësuar radhët.

Qeveria, e përbërë nga blloku konservator i kancelarit Friedrich Merz dhe social-demokratët e qendrës së majtë, ka propozuar rikthimin e shërbimit ushtarak vullnetar si një zgjidhje për nevojat urgjente të forcave të armatosura.

Megjithatë, partitë nuk kanë arritur ende konsensus për mekanizmat zbatues, në rast se nuk ka mjaftueshëm vullnetarë për t’u bashkuar me Bundeswehr-in.

Debati zhvillohet në sfondin e shqetësimeve të rritura për sigurinë në Evropë, të nxitura nga lufta pothuajse katërvjeçare e Rusisë kundër Ukrainës, e cila ka rritur presionin mbi vendet anëtare të NATO-s për të forcuar kapacitetet mbrojtëse.