Hungaria kundër futjes së Ukrainës në BE: Na fut në luftë

Festa e Ukrainës pasi KE rekomandoi hapjen e negociatave të anëtarësimit për në BE, mesa duket zgjati shumë pak. Hungaria është shteti i parë që rreshtohet kundër këtij vendimi, duke ngritur shqetësime për sigurinë e bllokut.

“Ministri i jashtëm ka shprehur shqetësimin se Ukraina nuk është gati për anëtarësim në BE për shkak të konflikteve të vazhdueshme, të cilat mund të sjellin luftë në BE. Ai theksoi dështimin e Ukrainës për të përmbushur kriteret e vendit kandidat për në BE dhe theksoi shkeljet e të drejtave të pakicave. Shefi i diplomacisë bëri thirrje gjithashtu për prioritizimin e integrimit të vendeve të Ballkanit Perëndimor në BE, veçanërisht përparimin e Serbisë”, tha Zoltan Kovacs, zëdhënës i qeverisë së Hungarisë.

Presidentja e Komisionit Europian, Ursula von der Leyen, tha se Ukraina i ka përmbushur thuajse plotësisht kërkesat dhe rekomandimet, ndërsa njoftoi se një vendim zyrtar për hapjen ose jo të negociatave pritet në dhjetor nga Këshilli Europian.