Agjencia hapësinore e Indisë lëshoi sot në hapësirë një anije kozmike pa pilot e cila pritet të ulet muajin e ardhshëm në polin jugor të Hënës. Ky operacion i ndërmarrë mund të përmirësojë pozicionin e Indisë si një fuqi e madhe hapësinore.
Raketa LVM3 e Organizatës Indiane të Kërkimit Hapësinor (ISRO) u lëshua pasditen e sotme me orën lokale nga porti kryesor kozmik i vendit në shtetin jugor të Andhra Pradesh. Rreth 16 minuta më vonë, qendra e kontrollit të ISRO njoftoi se raketa kishte futur me sukses anijen Chandrayaan-3 në orbitën e Tokës, duke e dërguar atë në rrugën e saj drejt uljes në Hënë muajin e ardhshëm.
Nëse misioni do të rezultojë i suksesshëm, India do t’i bashkohet një grupi prej tre vendeve të tjera që kanë arritur të bëjnë ulje të kontrolluar në Hënë, duke përfshirë Shtetet e Bashkuara, ish-Bashkimin Sovjetik dhe Kinën.
Anija hapësinore Chandrayaan-3 do të jetë gjithashtu e para që do të ulet në polin jugor të Hënës, një zonë me interes të veçantë për agjencitë hapësinore dhe kompanitë private hapësinore për shkak të pranisë së ujit të ngrirë që mund të mbështesë një stacion hapësinor të ardhshëm. Raketa u lëshua nga pika kryesore e lëshimit të Indisë në orën 14:35.