Iraku i kërkon Turqisë të tërheqë trupat në Mosul

Qeveria irakene i ka kërkuar Turqisë që të tërheqë trupat ushtarake që ka dërguar pranë qytetit verior të Mosulit. Për kryeministrin Haider al Abadi, kjo lëvizje ka qenë një shkelje serioze e sovranitetit të Irakut. “Respektoni fqinjësinë e mirë dhe tërhiquni menjëherë nga territori iraken”, ka qenë apeli i Bagdadit zyrtar. 
Ushtarët turq janë vendosur në afërsi të qytetit Bashika për të stërvitur forcat kurdo-irakene. Turqia gëzon marrëdhënie të afërta me rajonet autonome kurde në Irak, edhe pse grupet kurdo-siriane në kufi i sheh si armiqësore.
Mosuli ndodhet nën kontrollin e Shtetit Islamik që prej vitit të kaluar. Rënia e tij ishte një moment kyç në ngritjen e Shtetit Islamik dhe ofensivat e qeverisë për ta rimarrë nën kontroll kanë dështuar. Këtë javë, Mbretëria e Bashkuar kreu sulmet e para ajrore kundër Shtetit Islamik në Siri, ndërsa Gjermania votoi pro dërgimit të mbështetjes ushtarake në luftën kundër grupit terrorist.