Italia blindon aeroportet, rritet niveli i alarmit në Romë

Sulmet terroriste në Bruksel kanë vënë në alarm edhe Italinë, teksa në aeroportin “Fiumicino” të Romës niveli i rrezikut është rritur në maksimum.

E njëjta situatë është edhe në aeroportin tjetër “Leonardo da Vinci”, ku masat e sigurisë ishin rritur në fakt që prej sulmeve terroriste në Paris.

Kontrollet e pasagjerëve dhe kordonët e sigurisë janë shtuar, sikundër është rritur ndërkohë edhe numri i rojeve tek check in-et.

Gjithashtu, autoritetet kanë anuluar të gjitha fluturimet për në Bruksel, që për këtë të martë ishin parashikuar të ishin shtatë të tilla.

Kompania e fluturimeve “Alitalia” ka bërë të ditur se asnjë nga avionët e saj nuk ndodhet në aeroportin Zaventem, ku u verifikuan dy shpërthime.

Ndërkohë, në qytet, Kuestura e Romës ka vendosur përforcimin e sigurisë në të gjitha pikat e konsideruara të rëndësishme, si stacionet e metrove dhe ato hekurudhore.

Gjithashtu, është rritur prania e rojeve të sigurisë në Ambasadën e Belgjikës në Romë dhe në të gjitha rezidencat e institutet diplomatike e kulturore belge.

Plani i masave ka përfshirë edhe selinë e shenjtë të Vatikanit, duke pasur parasysh sfondin islamik të sulmeve terroriste.