Izraeli lejon rifillimin e ndihmave humanitare në Rripin e Gazës

TEL AVIV – Pas një pezullimi të përkohshëm,  Izraeli ka lejuar hyrjen e ndihmave humanitare në Rripin e Gazës,  në përputhje me marrëveshjet ekzistuese dhe pas inspektimeve të sigurisë.

Sipas një zyrtari izraelit të sigurisë,  udhëheqja politike ka urdhëruar që ndihmat të vazhdojnë të hyjnë përmes Kalimit të Kerem Shalom dhe pikave të tjera kufitare,  pas verifikimeve të nevojshme.

Megjithatë,  mbetet e paqartë se sa kalime janë aktualisht funksionale për shpërndarjen e ndihmave.

Ndihmat ishin ndaluar pas një sulmi me raketë antitank ndaj forcave izraelite në jug të Gazës,  ku humbën jetën dy ushtarë. Ushtria izraelite reagoi me sulme ajrore,  të cilat u cilësuan si më të rëndat që nga fillimi i armëpushimit më 10 tetor.Hamasi ka mohuar akuzat për sulm ndaj forcave izraelite.Burime spitalore raportuan se 44 palestinezë humbën jetën nga sulmet ajrore.

Pika kufitare e Rafahut,  që lidh Gazën me Egjiptin,  do të mbetet e mbyllur për trafikun e pasagjerëve deri në një njoftim të mëtejshëm,  sipas burimeve izraelite të sigurisë.