Izraeli vazhdon të ndalojë hyrjen e gazetarëve në Rripin e Gazës

Gazetarët ndërkombëtarë ende nuk lejohen të hyjnë lirshëm në Rripin e Gazës,  pavarësisht marrëveshjes për armëpushim në konfliktin mes Izraelit dhe Hamasit.

Shoqata e Shtypit të Huaj (FPA) ka kërkuar zyrtarisht që gazetarëve t’u mundësohet qasja në këtë zonë bregdetare të mbyllur. Kërkesa u shqyrtua në një seancë të Gjykatës së Lartë në Jerusalem,  e cila i dha qeverisë izraelite një afat prej 30 ditësh për të paraqitur një qëndrim të qartë mbi këtë çështje.

FPA-ja reagoi me zhgënjim ndaj vendimit,  duke akuzuar autoritetet izraelite për përdorimin e taktikave të vonesës.

Hyrja në Rripin e Gazës kontrollohet plotësisht nga Izraeli. Që nga fillimi i konfliktit më shumë se dy vjet më parë,  gazetarët e huaj kanë pasur mundësi të vizitojnë zonën vetëm të shoqëruar nga ushtria izraelite,  dhe u janë treguar vetëm pjesë të kufizuara.

Në gusht,  Presidenti amerikan Donald Trump kishte rekomanduar që Izraeli të lejojë hyrjen e gazetarëve në Rripin e Gazës,  duke e cilësuar transparencën si thelbësore për raportimin ndërkombëtar.