Kryeministri i Suedisë jep dorëheqjen pasi humbi në zgjedhje

Kryeministri suedez, Ulf Kristersson, ka njoftuar dorëheqjen nga posti pas rezultatit të zgjedhjeve parlamentare, të cilat konfirmuan humbjen e bllokut të tij politik të djathtë.

Sipas rezultateve përfundimtare, partitë e krahut të majtë kanë siguruar shumicën në parlament. Social-Demokratët, të drejtuar nga ish-kryeministrja Magdalena Andersson, kanë dalë si forca kryesore politike.

Diferenca mes dy kampeve ka qenë e ngushtë, me pak më shumë se 50 mijë vota.

Në përbërjen e re të parlamentit, blloku i majtë do të ketë 176 deputetë, ndërsa kampi i Kristerssonit, i përbërë nga tri partitë qeverisëse dhe Demokratët e Suedisë, do të ketë 173 mandate.

Përmes një reagimi në platformën X, Kristersson tha se rezultati i ngushtë ka krijuar vështirësi për formimin e qeverisë së ardhshme.

Ai theksoi se dallimet mes qëndrimeve të partive politike e bëjnë të nevojshëm dialogun mes të gjitha forcave të përfaqësuara në parlament.

Kristersson deklaroi se tashmë nevojiten negociata për të gjetur një zgjidhje për situatën politike dhe për të krijuar bazën për një qeveri të qëndrueshme dhe funksionale.

Dorëheqja e tij i hap rrugë procesit të negociatave për formimin e qeverisë së re në Suedi, ndërsa rezultati i ngushtë parlamentar pritet ta bëjë procesin e krijimit të shumicës qeverisëse më kompleks.