Kryeministri polak Tusk: Askush s’duhet t’i kërkojë Zelenskyt kompromise territoriale

Kryeministri i Polonisë,  Donald Tusk,  ka reaguar me tone të forta kundër çdo përpjekjeje për t’i kërkuar presidentit ukrainas Volodymyr Zelensky lëshime territoriale si pjesë e negociatave për paqe me Rusinë. Në një deklaratë publike të shpërndarë në platformën X ,  Tusk theksoi se presioni duhet të ushtrohet ndaj agresorit,  jo ndaj viktimës.

“Askush prej nesh nuk duhet t’i bëjë presion Zelenskyt për lëshime territoriale. Përkundrazi,  e gjithë përpjekja ndërkombëtare duhet të përqendrohet në ushtrimin e presionit ndaj Rusisë,  në mënyrë që ajo të ndalojë agresionin e saj të pajustifikuar kundër Ukrainës,”  shkroi Tusk.

Kreu i qeverisë polake kritikoi idenë e paqësimit — përpjekjen për të arritur paqe përmes lëshimeve ndaj agresorit — duke e cilësuar si një qasje të gabuar dhe të rrezikshme:

“Paqësimi nuk ka qenë kurrë rruga drejt një paqeje të drejtë dhe të qëndrueshme.”

Deklarata e Tusk vjen në një moment kur disa vende evropiane po shqyrtojnë mundësinë e negociatave mes Kievit dhe Moskës,  ndërsa Polonia mbetet një nga mbështetëset më të forta të Ukrainës që prej fillimit të agresionit rus.