Medvedev: Ankaraja e mbron ISIS-in se ka interesa financiare me të

Disa zyrtarë turq kanë interesa të drejtpërdrejta financiare në tregtinë e naftës me grupin terrorist Shteti Islamik.

Kjo u pohua sot nga kryeministri i Rusisë, Dimitri Medvedev, teksa foli për një reagim të mundshëm të vendit të tij, pas rrëzimit nga Turqia të një avioni ushtarak rus të martën.

“Veprimet e Turqisë janë një mbrojtje de facto e Shtetit Islamik’, tha Medvedev.

Dhe kjo sipas tij, nuk është surprizë, po të kemi parasysh informacionin 'që ne kemi në lidhje me interesat e drejtpërdrejta financiare të disa zyrtarëve turq, që kanë të bëjnë me furnizimin e produkteve të naftës që përpunohen në impiantet e kontrolluara nga ISIS'.

“Veprimet kriminalë të autoriteteve turke kanë shkaktuar një përshkallëzim të rrezikshëm të marrëdhënieve mes Rusisë dhe NATO-s, që nuk mund të justifikohen nga asnjë interes, duke përfshirë edhe mbrojtjen e kufijve shtetërorë”, tha ai.

Gjithashtu, sipas kryeministrit rus, Rusia po shqyrton mundësinë e anullimit të disa projekteve të rëndësishme me Turqinë, si dhe ndalimin e kompanive turke në tregjet ruse.

Sakaq, Rusia u ka rekomanduar tashmë qytetarëve të saj të mos udhëtojnë në Turqi, duke cituar rreziqet nga terrorizmi. Kjo ka bërë që shumë operatorë rusë të tërheqin udhëtimet drejt Turqisë.