Mogherini thotë se BE’ja përkrah marrëveshjen me Iranin

Shefja e BE’së për Politikë të Jashtme dhe Siguri, Federica Mogherini thotë se blloku do të qëndrojë përkrah marrëveshjes për armët bërthamore të Iranit, duke ngritur shqetësime për një konflikt të mundshëm me presidentin amerikan, Donald Trump, i cili është kundër kësaj marrëveshjeje.

Mogherini ka insistuar se kjo marrëveshje përmbush nevojat e sigurisë të Evropës dhe se është “provë se diplomacia funksionon”.

Në të njëjtën kohë, gjatë një takimit të ministrave të BE’së, Sekretari i Jashtëm i Britanisë, Borsi Johnson ka thënë se marrëveshja bërthamore duhet të mirëmbahet, transmeton Gazeta Express.

Presidenti i zgjedhur amerikan, Donald Trump ka kritikuar marrëveshjen me Iranin duke e cilësuar si “njëra nga marrëveshjet më të këqija të arritura ndonjëherë”.

Marrëveshja, e nënshkruar më 2015 mes Iranit dhe gjashtë fuqive botërore, ka për qëllim që të vë kufizime në programin bërthamor të Teheranit në këmbim të lehtësimit të sanksioneve ekonomike./Express/