Lewis Hamilton ka reaguar ashpër ndaj zërave që qarkulluan ditët e fundit, duke mohuar kategorikisht se ka kërkuar zëvendësimin e anëtarëve të ekipit të Ferrarit. Kampioni i shtatëfishtë i botës, përmes një mesazhi në rrjetet sociale, hodhi poshtë pretendimet se ai kishte shprehur dëshirën për të riorganizuar stafin e Scuderia-s në pistë, duke kërkuar largimin e disa figurave kyçe. Këto spekulime kishin krijuar një atmosferë tensioni rreth ardhjes së tij të pritshme te skuadra italiane.
“Nuk kam kërkuar kurrë që dikush nga ekipi im të zëvendësohet,” shkroi Hamilton në Instagram. Ai theksoi se kishte parë historitë që qarkullonin dhe dëshironte të sqaronte situatën. “Të gjithë njerëzit me të cilët punoj angazhohen fort çdo ditë dhe përkushtimi i tyre është ajo që na lejon të ecim përpara,” shtoi ai, duke vënë në dukje rëndësinë e punës kolektive dhe vlerësimin e tij për çdo anëtar të ekipit.
Këto zëra vijnë pas kritikave të mëparshme të Hamiltonit ndaj menaxhimit të Fred Vasseur, veçanërisht pas duelit me Leclerc në kthesën 2 në Monza, ku ai kishte theksuar se priste që urdhrat e ekipit të ishin futur shumë kohë më parë. Spekulimet e reja flisnin për fërkime të brendshme, sidomos në lidhje me marrëdhënien mes Hamiltonit dhe disa anëtarëve të ekipit të garave gjatë fundjavave të Grand Prix-ve.
Megjithatë, Lewis iu përgjigj me vendosmëri, duke theksuar filozofinë e tij personale. “Unë gjithmonë përpiqem t’i fuqizoj njerëzit dhe t’i ndihmoj ata të jenë versioni më i mirë i vetes së tyre. Ose të paktën të shohin më të mirën që kanë brenda vetes. Ndoshta nuk ia dal gjithmonë, por ky është qëllimi im dhe për këtë jam këtu. Ne punojmë të gjithë së bashku dhe do të vazhdojmë ta bëjmë këtë,” përfundoi Hamilton në mesazhin e tij, duke konfirmuar angazhimin e tij për unitet dhe bashkëpunim.
Marrë nga La Gazzetta dello Sport