Ndërhyrje në zgjedhje dhe dokumentet sekrete? Prokurori Smith kërkon pushimin e çështjeve ndaj Trump

Prokurori i Posaçëm Jack Smith i kërkon një gjykatësi federal të pushojë çështjen ndaj Donald Trump nën akuzën për komplot për të përmbysur rezultatin e zgjedhjeve të vitit 2020. Smith tha se vendimi i tij bazohet në një praktikë të hershme të Departamentit të Drejtësisë për të mos ngritur padi penale ndaj presidentëve në kohën që ata janë duke ushtruar detyrën.

Ky vendim shënon fundin e një përpjekjeje historike të Departamentit të Drejtësisë për ta mbajtur përgjegjës zotin Trump, për atë që prokurorët e quajnë komplot për të mos u larguar nga pushteti, që kulmoi me sulmin e mbështetësve të tij ndaj ndërtesës së Kongresit më 6 janar të vitit 2021. Në dokumentet e paraqitura në gjykatë prokurorët shprehen se sipas Departamentit të Drejtësisë “Kushtetuta kërkon që kjo çështje të pushohet përpara se i pandehuri të fillojë detyrën”.

Ky ishte një vendim i pritshëm pasi ekipi i zotit Smith kishte filluar shqyrtimin e alternativave se si t’i pushonte dy aktpaditë që kishte ngritur ndaj zoti Trump, atë për ndërhyrjen në zgjedhjet e vitit 2020 si dhe atë të dokumenteve të klasifikuara që iu gjetën në shtëpi pas largimit nga detyra. Por sot një orë më vonë, depozitoi tek gjykatësi federal kërkesën për pushimin e çështjes ndaj ish-Presidentit Donald Trump për zotërim të paligjshëm të dokumenteve sekrete. /VOA/