Shtetet e Bashkuara u përballën të shtunën me një situatë të rënduar nga zjarret, duke kaluar në nivelin më të lartë të gatishmërisë. Sipas autoriteteve federale, në vend u raportuan 149 incidente aktive, përfshirë 88 zjarre të mëdha që vijonin të ishin jashtë kontrollit, ndërsa rreth 29 mijë e 400 forca ishin angazhuar në operacione.
Gjendja më problematike paraqitet në veriperëndim të SHBA-së, veçanërisht në Oregon dhe Uashington, ku vijojnë evakuimet e banorëve dhe kufizimet në qarkullimin rrugor.
Edhe Kanadaja po përballet me vatra të mëdha zjarri. Në Kolumbinë Britanike, zjarri “Bald Range” ka përfshirë mbi 20 mijë hektarë, duke detyruar autoritetet të lëshojnë urdhra të rinj evakuimi për disa komunitete. Në zona të tjera, banorët kanë nisur të rikthehen në banesat e tyre.
Në Evropë, situata mbetet shqetësuese, me zjarre aktive në Spanjë dhe Francë. Në Hueska, flakët kanë përfshirë më shumë se 15 mijë hektarë dhe kanë detyruar mbi një mijë persona të largohen nga zona.
Në jugperëndim të Francës janë evakuuar mbi 500 banorë, ndërsa në Gjermani zjarri më i madh i regjistruar në Renaninë Veriore-Vestfali u vu nën kontroll të shtunën, pasi më shumë se 2 mijë persona u evakuuan.
Në Ballkan, Greqia raportoi mbi 50 zjarre brenda 24 orëve dhe këtë të diel ka vendosur në nivel të lartë gatishmërie Atikën, Eubenë, Cikladet dhe Kretën. Ndërkohë, në Kroaci vijon beteja me flakët në ishullin Dugi Otok, ndërsa në Serbi ekipet e emergjencës po përballen me dhjetëra vatra zjarri.