Nis procesi i ri kundër Sarkozisë, shpenzoi 43 milionë euro në fushatë

Ish-presidenti francez, Nikola Sarkozi, është rikthyer në bankën e të akuzuarit dy javë pas marrjes së dënimit për korrupsion.

Të mërkurën një Gjykatë në Paris nisi procesin për aferën “Bigmalion”, e cila në thelb ka të bëjë me shpërdorimin e fondeve elektorale.

“Bigmalion” ishte agjencia që Sarkozi përdori në vitin 2012 për fushatën e tij presidenciale.

Sipas akuzës, agjencia falsifikoi faturat financiare për të lejuar ish-presidentin të shpenzonte më shumë para sesa ia lejonte ligji për zgjedhjet.

Skemën e zbuloi vetë ish-menaxheri i fushatës së Sarkozisë, Zherom Lavrijë.

“Kam katër vite që pres përfundimin e procedurave dhe referimin tim në tribunal. E pranoj se kam bërë diçka të dënueshme dhe nuk jam aq naiv sa të pretendoj falje absolute.”

Ligji francez për zgjedhjet e detyron një kandidat të mos kalojë pragun e 22 milionë e gjysmë euro shpenzime mes dy raundeve të votimit.

Prokurorët vlerësojnë se ish-presidenti Sarkozi shpenzoi dyfishin e vlerës së lejuar apo rreth 43 milionë euro në raundin e dytë.

Shpenzimet e tepërta u fshehën nga agjencia “Bigmalion” me dijeninë e partisë së Sarkozisë.

Drejtuesit e agjencisë akuzohen tani për mashtrim, ndërsa ish-presidenti 66-vjeçar për financim të paligjshëm të fushatës.

Gjykimi i çështjes ndaj tyre pritet të zgjatë deri më 15 prill ndërsa Sarkozija rrezikon një vit burg dhe gjobë 3,750 euro nëse shpallet fajtor.