OKB: Në Gaza 630 mijë fëmijë kthehen në shkollë pas dy vitesh pushim

Në Gaza po rifillon gradualisht aktiviteti shkollor për të rikthyer fëmijët në bankat e shkollës, pas më shumë se dy vitesh ndërprerje.

OKB-ja po përgatit një plan për mbi 630 mijë fëmijë në moshë shkollore dhe po punon për rindërtimin e mbi 90 klasave në Deir al-Balah dhe Khan Younis, nga më shumë se 2mijë që kanë nevojë për ndërhyrje në të gjithë Rripin e Gazës.

Zëdhënësi i OKB-së, Stephane Dujarric, theksoi se kufizimet e vendosura nga autoritetet izraelite për hyrjen e materialeve mësimore dhe furnizimeve edukative vazhdojnë të pengojnë punën e organizatës.

Ndërkohë autoritetet palestineze raportojnë se mbi 10 mijë persona janë të zhdukur nën rrënojat e Gazës.

Ahmed Radwan, përgjegjës për shtypin në Mbrojtjen Civile në Rafah, tha për Al-Aqsa TV se ekipet po përpiqen pa ndërprerje të gjejnë të zhdukurit, por mungesa e pajisjeve dhe materialeve mjekësore e pengon shpëtimin.

Ai shtoi se janë të nevojshme makina të rënda për nxjerrjen e trupave dhe akuzoi Izraelin se po synon qëllimisht ekipet e shpëtimit, duke shkelur ligjin ndërkombëtar.