Paniku në ajër, çahet xhami i avionit gjatë fluturimit

Një avion i Ryanair që fluturonte nga Selaniku drejt Memmingenit në Gjermani u detyrua të rikthehej në aeroport pas një incidenti që shkaktoi humbje të presionit në kabinë. Avioni u ngrit rreth orës 06:12 dhe u ul sërish në Selanik rreth orës 07:09, pasi u dëmtua një dritare gjatë fluturimit dhe u aktivizuan maskat e oksigjenit.

Ryanair konfirmoi ngjarjen dhe bëri të ditur se një pasagjer kërkoi ndihmë mjekësore pas uljes. Sipas mediave greke, një 61-vjeçar nga Serbia u dërgua në spital për kontrolle, ndërsa tre pasagjerë të tjerë morën trajtim për dëmtime të lehta.

Dyshimet fillestare përfshijnë mundësinë që dëmtimi i dritares të jetë shkaktuar nga mbetje të jashtme, por kjo nuk është konfirmuar zyrtarisht. Pasagjerët vijuan udhëtimin me një avion tjetër të siguruar nga kompania. Autoritetet kanë nisur hetimet për të përcaktuar shkakun e incidentit.