Vetëm një javë pas fitores së opozitës së mbështetur nga studentët në zgjedhjet parlamentare në Serbi, autoritetet kanë arrestuar Marko Kriçakun, drejtuesin e Policisë Kriminale Serbe. Arrestimi është kryer me urdhër të Prokurorisë, ndërsa nën hetim është edhe zëvendësi i tij, Bosko Sekuloviç. Sipas mediave serbe, të cilat i referohen agjencisë shtetërore Tanjug, të dy zyrtarët dyshohen për shpërdorim detyre.
Kriçaku, i konsideruar si një prej njerëzve të afërt të presidentit Aleksandar Vuçiç, akuzohet për ndërhyrje në hetimet e një vrasjeje të lidhur me mafian. Prokuroria dyshon se ai ka manipuluar prova për të penguar procesin hetimor dhe për të mundësuar tërheqjen e akuzave ndaj personave të përfshirë në ngjarje.
Përveç kësaj çështjeje, ndaj tij rëndojnë edhe dyshimet për keqtrajtim dhe intimidim të protestuesve paqësorë. Një prej episodeve të përmendura lidhet me gushtin e vitit 2025, kur efektivë policie dyshohet se kanë tërhequr me forcë disa studentë drejt bodrumeve të një ndërtese qeveritare në Beograd.
Në atë periudhë, Kriçaku drejtonte Njësinë e Mbrojtjes Personale të Policisë dhe dyshohet se ka qenë vetë në krye të operacionit. Sipas akuzave, ai ka goditur një studente dhe e ka kërcënuar me përdhunim.
Karriera e tij në strukturat e sigurisë nisi pas një periudhe kur punonte si shitës makinash. Më pas u rekrutua në Agjencinë e Inteligjencës së Brendshme (BIA), ndërsa në vitin 2023 mori drejtimin e Njësisë së Mbrojtjes Personale. Në fund të vitit 2025 u emërua në krye të Policisë Kriminale.
Arrestimi vjen në një moment delikat për Serbinë, pas fitores së listës opozitare të mbështetur nga studentët, e cila siguroi shumicën parlamentare, duke lënë jashtë pushtetit koalicionin e drejtuar prej vitesh nga Vuçiç. Zhvillimi ngre pikëpyetje mbi të ardhmen e strukturave të sigurisë të lidhura me pushtetin e deritanishëm.