Politikani gay kritikohet pas lindjes së fëmijës me nënë surrogate

Ish-ministri gjerman i Shëndetësisë dhe një nga figurat kryesore të CDU-së, Jens Spahn, po përballet me kritika të forta dhe kërkesa për dorëheqje pasi njoftoi se ai dhe bashkëshorti i tij janë bërë prindër përmes një nëne surrogate në SHBA.

Surrogacia është e ndaluar në Gjermani dhe ndalimi mbështetet edhe nga CDU, ndërsa vetë Spahn e ka mbrojtur publikisht këtë qëndrim në të kaluarën. Edhe pse ligji gjerman nuk ndalon rritjen e fëmijëve të lindur nga surrogacia jashtë vendit, rasti ka hapur debat për besueshmërinë dhe standardet e dyfishta të politikanëve.

Kritikat kanë ardhur edhe nga brenda CDU-së, ku disa drejtues kanë kërkuar dorëheqjen e Spahn, duke argumentuar se një politikan nuk mund të mbështesë një ligj dhe më pas ta anashkalojë atë jashtë vendit. Kancelari Friedrich Merz tha se çështja do të diskutohet në kryesinë e partisë, por theksoi se CDU nuk planifikon të ndryshojë qëndrimin kundër surrogacisë.

Sipas BBC-së, Spahn kishte refuzuar në vitin 2020 një propozim për lehtësimin e ndalimit të surrogacisë dhe më herët ishte shprehur se kishte vështirësi ta pranonte këtë praktikë. Debati është zgjeruar edhe në nivel evropian, ku vendet kanë qasje të ndryshme ndaj njohjes së surrogacisë së kryer jashtë kufijve.