Progresraporti i KE: Shqipëria e angazhuar fuqishëm në rrugën drejt BE-së

Komisioni Evropian publikoi sot progresraportin e vitit 2025 për Shqipërinë,  duke vlerësuar angazhimin e autoriteteve shqiptare në procesin e negociatave të anëtarësimit dhe përmbushjen e kushteve të vendosura nga Bashkimi Evropian.

Raporti evidenton përparimin e Shqipërisë në disa fusha themelore, sundimin e ligjit,  reformen në drejtësi, administraten publike,  procesin zgjedhor.

Pas konferencës së dytë ndërqeveritare më 15 tetor 2024,  e cila hapi negociatat mbi grupkapitullin “Themeloret”,  u zhvilluan katër Konferenca Ndërqeveritare të tjera,  duke çuar në hapjen e negociatave për katër grupkapituj të tjerë.

Raporti thekson se autoritetet shqiptare kanë ruajtur një nivel të lartë ambicieje dhe angazhimi politik ndaj integrimit evropian,  duke e konsideruar atë si përparësinë kryesore të vendit. Ky vrull duhet të përkthehet në reforma më të shpejta dhe më të thella.

Shqipëria ka ruajtur përafrimin e plotë me politikën e jashtme dhe të sigurisë të BE-së,  përfshirë masat kufizuese dhe sanksionet kundër Rusisë,  duke dëshmuar zgjedhjen e saj strategjike dhe rolin si partner i besueshëm.

Raporti ndalet edhe te zgjedhjet parlamentare të 11 majit 2025,  të cilat pasuan një reformë të pjesshme zgjedhore dhe sollën një mandat të katërt për partinë në pushtet.

Sipas vëzhguesve të OSBE/ODIHR,  zgjedhjet ishin konkurruese dhe të organizuara profesionalisht,  por u identifikuan disa mangësi,  si mungesa e një fushe loje të barabartë dhe abuzimi me burimet publike.