Putin akuzon NATO-n: Disa liderë evropianë po përgatiten për luftë me Rusinë

Presidenti rus Vladimir Putin ka deklaruar se NATO po zgjeron shtrirjen dhe kapacitetet e saj, ndërsa disa liderë evropianë, sipas tij, po përgatiten për një konflikt të mundshëm me Rusinë. Deklaratat u bënë gjatë një takimi të Komisionit Ushtarak-Industrial në Rusi, ku u diskutua edhe programi i ri shtetëror i armatimeve.

Putin tha se kërcënimet ndaj sigurisë së Rusisë nuk janë zvogëluar dhe akuzoi disa drejtues evropianë se po përdorin retorikën për një konflikt të mundshëm me Moskën për të mbuluar, sipas tij, problemet e brendshme ekonomike dhe sociale.

Kreu i Kremlinit u shpreh gjithashtu se Rusia do të reagojë ndaj asaj që e konsideron si kërcënim. Në të njëjtën kohë, ai përsëriti qëndrimin se Moska nuk ka synime agresive ndaj Evropës dhe deklaroi se Rusia është e gatshme të rivendosë marrëdhëniet dhe bashkëpunimin me vendet evropiane.

Deklaratat e Putinit vijnë në një kohë kur disa vende evropiane kanë rritur masat e sigurisë dhe mbrojtjes, duke përmendur rreziqe të mundshme nga sulmet hibride, dronët, sabotazhet dhe sulmet kibernetike. NATO, megjithatë, nuk ka deklaruar se një sulm rus ndaj një vendi anëtar është i pashmangshëm.