Putin dhe Trump mund të takohen në Kinë, Kremlini: Nëse marrin pjesë, do të flasin!

Presidenti rus Vladimir Putin dhe homologu i tij amerikan Donald Trump mund të zhvillojnë një takim në Kinë gjatë muajit nëntor, në kuadër të samitit të Bashkëpunimit Ekonomik Azi-Paqësor (APEC).

Deklarata është bërë nga Yury Ushakov, ndihmës i presidentit rus për politikën e jashtme. Ai tha se një takim mes dy liderëve do të ishte i mundshëm nëse të dy vendosin të marrin pjesë në samit.

“Nëse udhëheqësit janë në të njëjtin aktivitet, atëherë më duket se në mënyrë të pashmangshme do të takohen dhe do të flasin”, deklaroi Ushakov për televizionin shtetëror rus VGTRK.

Megjithatë, zyrtari i Kremlinit sqaroi se deri tani nuk ka plane konkrete apo sinjale për një takim Putin-Trump. Sipas tij, samiti i APEC-ut është ende rreth tre muaj larg dhe situata mund të ndryshojë gjatë kësaj periudhe.

“Përpara kësaj kemi ende shumë ngjarje të mëdha ndërkombëtare”, u shpreh Ushakov.

Në të njëjtën intervistë, ministri i Jashtëm rus Sergej Lavrov deklaroi se vendet e NATO-s dhe Bashkimit Europian nuk do të distancohen publikisht nga mbështetja ushtarake për Ukrainën.

Lavrov akuzoi disa vende perëndimore për ndjekjen e një politike që ai e cilësoi si “anti-ruse”, duke përmendur Britaninë, Brukselin, Francën, Gjermaninë dhe vende të tjera anëtare të NATO-s dhe BE-së.

Sipas tij, Rusia do të marrë parasysh veprimet e asaj që ai e përshkroi si “elita hapur rusofobe” në këto vende.

Nëse Putin dhe Trump do të jenë të pranishëm në samitin e APEC-ut në Kinë, një takim mes tyre do të ishte një tjetër mundësi për kontakte direkte mes Moskës dhe Uashingtonit në një periudhë të tensionuar ndërkombëtare.