Putin, Merkel dhe Hollande bashkëpunim për të luftuar terrorizmin

Tre liderët e Rusisë, Gjermanisë dhe Francës pranuan sot që të përshpejtojnë shkëmbimin e të dhënave, me qëllim që të jenë më efikas në luftimin e terrorizmit.

Presidenti rus, Vladimir Putin, kancelarja gjermane Angela Merkel dhe presidenti francez, Francois Hollande biseduan sot në telefon për çështjen e terrorizmit dhe situatës në Ukrainë.

Ky diskutim vjen një ditë pas sulmit terrorist në metronë e Shën Pjetërsburgut, ku mbetën të vrarë 14 persona dhe u plagosën dhjetëra të tjerë.

Kremlini njoftoi se liderët biseduan edhe për armëpushimin e shpallur më 1 prill në lindje të Ukrainës.

Sipas medieve gjermane, “Merkel i ka bërë thirrje Putinit që të përdorë ndikimin që ka tek separatistët në lindje të Ukrainës, që të respektojnë armëpushimin”.