118 ditë protestë, Arben Kola: Pensionistët vuajnë, kurse Rama fle në dhomë me 15 mijë dollarë nata

Aktivisti dhe bashkë-organizatori i protestës, Arben Kola ka hedhur akuza ndaj kryeministrit Edi Rama dhe Taulant Ballës, gjatë fjalës së tij në protestën e 118-të. Kola pretendoi se Rama ka prenotuar në Nju Jork një dhomë hoteli me një kosto prej 15 mijë dollarësh nata, ndërsa sipas tij, Balla është akomoduar në një dhomë që kushton 10 mijë dollarë nata.

“Ndërkohë që pensionistët vuajnë, spitalet nuk kanë ilaçe, Rama fle në dhomë me 15 mijë dollarë nata, kurse Tao fle në dhomë me 10 mijë dollarë nata”, deklaroi Kola.

Duke iu referuar pjesëmarrjes së kryeministrit në Asamblenë e Përgjithshme të Kombeve të Bashkuara, aktivisti tha se protesta dhe kërkesat e opozitarëve duhet të vijojnë.

“Ne duhet të vazhdojmë me betejën se Rama do jetë te Asambleja e OKB-së Ramoviçi”, u shpreh ai. Kola artikuloi edhe kërkesat politike të protestuesve, duke kërkuar dorëheqjen e kryeministrit, krijimin e një qeverie të re tranzitore dhe ndryshime kushtetuese.

“Ne duam dorëheqjen e kryeministrit Rama, të krijohet qeveri e re tranzitore, ndryshime kushtetuese, që ka marrë peng vendin që në vitin 2008, ku kryetarët e partive kanë shumë pushtet. Kërkojmë që kryeministri të mos jetë në pushtet më shumë se dy mandate. Ne duam dorëheqje e vetëm dorëheqje”, deklaroi Kola.