Raport sekret: Lideri Suprem i Iranit, Ajatollahu Khamenei, ka një plan arratisjeje drejt Moskës

Lideri Suprem i Iranit, Ajatollahu Ali Khamenei, ka përgatitur një plan emergjence për t’u larguar nga vendi, në rast se forcat e sigurisë dështojnë të shtypin protestat e fundit që kanë përfshirë Republikën Islamike. Ky informacion vjen nga një raport i shërbimeve sekrete, cituar nga The Times, i cili thekson se 86-vjeçari Khamenei synon të largohet nga Teherani.

Plani parashikon që Khamenei të shoqërohet nga një rreth i ngushtë prej rreth 20 personash, përfshirë ndihmës dhe anëtarë të familjes, mes tyre edhe djali i tij Mojtaba, i cili konsiderohet trashëgimtar i mundshëm. Largimi do të ndodhë nëse ushtria dhe forcat e sigurisë, të mobilizuara për të frenuar trazirat, dezertojnë, kalojnë në anën e protestuesve ose refuzojnë të zbatojnë urdhrat.

Burime të inteligjencës i kanë thënë The Times se “Plani B” përfshin arratisjen direkte drejt Moskës për Khamenein dhe rrethin e tij të afërt. Beni Sabti, një veteran i inteligjencës izraelite, ka pohuar se Rusia është destinacioni i vetëm i mundshëm për liderin iranian. Ky plan arratisjeje është modeluar sipas largimit të ish-udhëheqësit sirian Bashar al-Assad, i cili u largua nga Damasku me avion drejt Moskës në dhjetor 2024, përpara se forcat opozitare të sulmonin kryeqytetin.

Përgatitjet për këtë rrugëdalje nga Teherani përfshijnë “grumbullimin e aseteve, pronave jashtë vendit dhe parave kesh për të lehtësuar kalimin e sigurt”, sipas burimit. Khamenei kontrollon një rrjet të gjerë pasurish, disa prej të cilave menaxhohen nga Setad, një nga organizatat më të fuqishme në Iran. Kjo organizatë është pjesë e një sistemi fondacionesh bamirësie gjysmë-shtetërore, të njohura për mungesën e transparencës financiare.

Vlera totale e këtyre aseteve llogaritej në rreth 95 miliardë dollarë në vitin 2013, sipas një hetimi të Reuters, duke përfshirë prona dhe kompani, të gjitha nën kontrollin e drejtpërdrejtë të Ajatollahut Khamenei.