Rritet bilanci tragjik në Venezuelë, mbi 1,400 viktima nga tërmetet shkatërruese

Bilanci i viktimave nga tërmetet e forta që goditën Venezuelën vazhdon të rëndohet. Sipas të dhënave më të fundit të bëra publike nga presidenti i Asamblesë Kombëtare, Jorge Rodríguez, numri i të vdekurve ka arritur në të paktën 1,430 persona.

Autoritetet raportojnë gjithashtu se 3,238 persona kanë mbetur të plagosur, ndërsa 3,142 familje kanë humbur banesat e tyre si pasojë e shembjes së ndërtesave dhe dëmeve të mëdha të shkaktuara nga lëkundjet sizmike.

Rodríguez bëri të ditur se situata mbetet kritike, pasi vendi është goditur nga të paktën 430 pasgoditje që nga dy tërmetet kryesore të së mërkurës, duke vështirësuar operacionet e kërkim-shpëtimit dhe duke shtuar frikën te banorët.

Ekipet e emergjencës vijojnë punën në zonat më të prekura për të gjetur të mbijetuar dhe për t’u ardhur në ndihmë mijëra familjeve të mbetura pa strehë, ndërsa autoritetet kanë paralajmëruar se bilanci i viktimave mund të rritet edhe më tej në orët dhe ditët në vijim.