Serbia e lirë, NATO i heq pengesat ajrore të vëna gjatë luftës

NATO i ka hequr ndalesat që ka aplikuar në hapësirat ajrore të Serbisë të vendosura në vitin 1999. Lajmi është dhënë nga sekretari i përgjithshëm i NATO-s, Jens Stoltenberg, në një konferencë për media pas takimit me kryeministrin serb, Aleksandar Vuçiç. Ai theksoi se KFOR-i ka vendosur ta qetësojë zonën e sigurisë.

“Këto ndalesa që ende janë të vlefshme për disa pjesë të Serbisë nuk do të ekzistojnë më”, tha Stoltenberg duke shtuar se kjo do të thotë integrim i plotë i Serbisë në hapësirën ajrore evropiane.

Ai u shpreh se ky është një veprim konkret për përmirësimin e marrëdhënieve NATO- Serbi.

Sipas Stoltenberg, vendimi është marrë si rrjedhojë e normalizimit të marrëdhënieve mes Prishtinës dhe Beogradit në dialogun e Brukselit.

Ndalesa ajrore ndaj Serbisë e njohur si Zona e Sigurisë Ajrore, në 16 vitet e fundit është zbatuar në një hapësirë ajrore prej 24 kilometra drejt Serbisë Qendrore duke filluar nga “kufijtë administrativë” me Kosovën. Stoltenberg sot ka nisur një vizitë 2-ditore në Serbi.