SHBA miraton ligjin e ri: Ndalohet shitja e duhanit për personat nën 21 vjeç

Një ligj i ri, i cili ndalon shitjen e produkteve të duhanit te personat nën moshën 21-vjeçare, ka hyrë tashmë në fuqi në Shtetet e Bashkuara të Amerikës.

Javën e kaluar, presidenti Donald Trump, nënshkroi moshën e re minimale për të blerë cigare, në kuadër të një projekt-ligji për shpenzimet gjithëpërfshirëse.

Administrata Amerikane e Ushqimit dhe Barnave (FDA) njoftoi se “tashmë është e paligjshme që dyqanet me pakicë t’u shesin produkte të duhanit, si cigare, puro dhe cigare elektronike, të rinjve nën 21 vjeç”.

Ky vendim, që vjen si pasojë e rritjes së konsumit të produkteve të duhanit nga të rinjtë, u konsiderua një hap i rëndësishëm nga presidenti Trump.

Përsa i përket ligjit shqiptar, mosha minimale për të blerë produktet e duhanit është 18 vjeç. “Të gjitha pikat e shitjes duhet të pajisen me tabelë të dukshme dhe të lexueshme, ku të shkruhet: ‘Ndalohet shitja e produkteve të duhanit personave nën 18 vjeç’,” shkruhet në ligjin “Për mbrojtjen e shëndetit nga produktet e duhanit”.