SHBA sekuestron një tjetër anije-cisternë në brigjet e Venezuelës

Shtetet e Bashkuara të Amerikës kanë sekuestruar një tjetër anije-cisternë në brigjet e Venezuelës, sipas zyrtarëve amerikanë. Ky operacion i vazhdueshëm udhëhiqet nga Roja Bregdetare, me mbështetjen e helikopterëve të ushtrisë amerikane, siç i tha një zyrtar NBC, partnerit amerikan të Sky. Si Roja Bregdetare ashtu edhe Pentagoni i referuan pyetjet rreth këtij veprimi Shtëpisë së Bardhë, e cila ende nuk ka komentuar. Ky zhvillim vjen pas sekuestrimit javën e kaluar të një anije-cisternë nafte të sanksionuar, të quajtur “Skipper”, gjithashtu në brigjet e Venezuelës.

Ndërkohë, ka pasur një rritje të vazhdueshme të forcave amerikane në rajon, duke e vendosur efektivisht Venezuelën nën embargo. Presidenti amerikan Donald Trump deklaroi të martën se “Venezuela është plotësisht e rrethuar nga Armada më e madhe e mbledhur ndonjëherë në Historinë e Amerikës së Jugut.” Ai shtoi se “ajo vetëm do të zmadhohet, dhe tronditja për ta do të jetë si asgjë që kanë parë më parë.”

Në postimin e tij në rrjetet sociale, presidenti Trump e cilësoi gjithashtu regjimin e Presidentit të Venezuelës, Nicolás Maduro, si “të paligjshëm” dhe një “organizatë terroriste të huaj”. Ai vazhdoi: “Prandaj, sot, unë po urdhëroj NJË BLLOKADË TOTALE DHE TË PLOTË TË TË GJITHA ANIJEVE-CISTERNË TË SANKSUARA që hyjnë dhe dalin nga Venezuela.” Që nga sekuestrimi i “Skipper”, anijet që transportojnë miliona fuçi nafte kanë qëndruar në ujërat venezueliane, nga frika se Shtetet e Bashkuara do t’i ndërpresin.

Disa prej këtyre anijeve konsiderohen pjesë e një “flote hije” – anije që përdorin taktika fshehjeje për të transportuar mallra për vende të sanksionuara si Rusia, Irani dhe Venezuela. Më shumë se 70 anije-cisternë nafte në ujërat venezueliane këtë javë janë pjesë e kësaj të ashtuquajture flote hije, me rreth 38 prej tyre të sanksionuara nga Thesari i SHBA-së, sipas të dhënave nga TankerTrackers.com.

Presidenti Trump ka rritur presionin ndaj regjimit të Maduros, duke e akuzuar atë për përfshirje në tregtinë e drogës. Si pjesë e përpjekjeve të tij, ai ka autorizuar gjithashtu sulme vdekjeprurëse kundër anijeve që ai pretendon se trafikojnë drogë në Karaibe dhe Paqësorin Lindor. Presidenti Maduro, nga ana e tij, pretendon se zoti Trump po përpiqet ta rrëzojë atë me qëllim që të sekuestrojë rezervat e naftës së Venezuelës.