SHBA, sulm me armë zjarri në kinema

Dy persona kanë humbur jetën dhe shtatë të tjerë janë plagosur si pasojë e një sulmi me armë zjarri në një kinema në qytetin Lafajete të Luizianës.

Ngjarja ka ndodhur pasditen e së enjtes ku një person i armatosur ka hapur zjarr në ambientet e një kinemaje duke shkaktuar dy viktima para se të vriste veten.

Policia nuk ka dhënë detaje të hollësishme për ngjarjen por ka informuar se sulmuesi ishte një mashkull rreth 58-vjeç.

Dëshmitarët thanë se të shtënat janë rregjistruar 20 minuta pas fillimit të filmit. Mendohet se gjatë sulmit me armë zjarri në ndërtesë ndodheshin rreth 100 persona.

Guvernatori I Luizianës i cili mbërriti në vendngjarje u tha gazetarëve se kjo është një natë e zezë për Luizianën dhe SHBA-në.