Shpërthim i fuqishëm në një spital në Irak, vdesin 60 pacientë

Rreth 60 persona kanë vdekur në Irak, pas një shpërthimi  zjarri në një repart spitali për pacientë me koronavirus.

Bëhet me dije nga mediat e huaja se shpërthimi në spitalin Al-Huseein, në qytetin jugor Nasiriya, ka arritur të  vihet nën kontroll në orët e vona të së hënës.

Deri më tani shkaku i zjarrit nuk dihet, mirëpo mendohet se ka nisur pas shpërthimit të një cilindri me oksigjen. Kryeministri irakian Mustafa al-Kadhemi, ka urdhëruar arrestimin e drejtorit të spitalit.

Familjarët e pacientëve kanë protestuar jashtë ndërtesës. Agjencia e lajmeve Reuters ka raportuar për përleshje me policinë dhe se dy makina policore janë përfshirë nga flakët.

Mësohet se Departamenti i ri ka pasur hapësirë për 70 shtretër dhe është ndërtuar vetëm tre muaj më parë, kanë thënë zyrtarë shëndetësorë për agjencinë e lajmeve Associated Press.