Temperaturat e larta, Franca mbyll përkohësisht një reaktor në centralin bërthamor Golfes

Një nga reaktorët e centralit bërthamor Golfes në Francë është mbyllur përkohësisht si masë sigurie, pasi temperaturat e larta të ujit të lumit Garonne kanë tejkaluar kufijtë e lejuar mjedisorë, sipas një zëdhënësi të centralit.

Centrali, i cili ka dy reaktorë me ujë të presionuar me kapacitet 1.3 GW secili, përdor ujin e lumit Garonne për ftohjen e sistemeve të tij. Njëri nga reaktorët u ndal pak para mesnatës pasi temperatura e ujit arriti në 28°C, kufiri maksimal i përcaktuar për të mbrojtur ekosistemin e lumit. Reaktori tjetër ishte tashmë jashtë funksionit për mirëmbajtje. Sipas një vendimi të vitit 2006, temperatura e ujit të lumit nuk duhet të kalojë 28°C pas shkarkimeve të centralit, në mënyrë që të mbrohet fauna dhe flora ujore. Franca mbështetet gjerësisht në energjinë bërthamore, me 57 reaktorë në total, të cilët kërkojnë sisteme të vazhdueshme ftohjeje dhe për këtë arsye ndodhen pranë lumenjve ose në zona bregdetare.

Gjatë periudhave të nxehtësisë ekstreme, rritja e temperaturës së ujërave mund të detyrojë operatorin EDF të reduktojë ose të ndalojë përkohësisht prodhimin, për të shmangur ndikimin negativ në mjedis. Në kushte normale, këto kufizime kanë ndikim të vogël në prodhimin vjetor, rreth 0.3%, por me ndryshimet klimatike kjo shifër mund të rritet deri në 1.4% në vitin 2035 dhe 1.5% në vitin 2050. Valët e të nxehtit që po godasin Francën kanë shtuar presionin mbi sistemin energjetik, duke detyruar kompaninë EDF të shqyrtojë uljen e prodhimit edhe në centrale të tjera bërthamore.