Tërmeti 7.7 ballë godet Indonezinë, 53 të vdekur dhe mijëra të evakuuar

Një tërmet i fuqishëm me magnitudë 7.7 ballë ka goditur Indonezinë, duke shkaktuar të paktën 53 viktima dhe detyruar mijëra banorë të largohen nga zonat e prekura.

Pas lëkundjeve të forta, zona e goditur është shpallur në gjendje të jashtëzakonshme, ndërsa autoritetet kanë nisur shpërndarjen e ndihmave për banorët e prekur. Ekipet e emergjencave vijojnë operacionet në terren, ndërsa situata mbetet e rënduar.

Në përpjekjet humanitare pritet të angazhohen edhe Kryqi i Kuq dhe Gjysmëhëna e Kuqe, të cilat kanë njoftuar përgatitjet për dërgimin e ndihmave në zonat e prekura.

Rajoni ku ndodhi tërmeti konsiderohet një nga zonat me aktivitet të lartë sizmik. Ai shtrihet pranë sistemit të çarjeve të harkut të pasmë Flores, i krijuar nga përplasja dhe lëvizja e pllakave tektonike në këtë pjesë të arkipelagut indonezian.

Kjo nuk është hera e parë që rajoni përballet me një tërmet të fuqishëm. Në vitin 1992, një tërmet me magnitudë 7.5 shkaktoi dëme të mëdha në zonë. Indonezia ndodhet në Unazën e Zjarrit të Paqësorit, një brez i njohur për aktivitetin e lartë sizmik dhe vullkanik. Vendi ka përjetuar ndër katastrofat më të rënda natyrore të dekadave të fundit.

Në vitin 2004, një tërmet me magnitudë 9.1 goditi brigjet e Sumatrës dhe shkaktoi një cunami masiv. Vetëm në Indonezi humbën jetën rreth 170 mijë persona, ndërsa numri i viktimave në vendet e tjera të prekura ishte rreth 50 mijë.